ஸ்பெஷல் மட்டும் என்ன ஸ்பெஷல்?!

ஆதியும் அந்தமும் இல்லா அண்டசராசரம் இருக்கிறதே, அதில் ஒரு குட்டித்துணுக்காக இருக்கிறது பால்வெளி மண்டலம் என்னும் நமது கேலக்சி. அதில் ஒரு மூலையில் இருக்கிறது சூரியக் குடும்பம். அந்தச் சூரியக் குடும்பத்திலே சூரியனிலிருந்து மூன்றாவது கோளாக இயங்கிக் கொண்டிருக்கிறது நமது பூமி. திருவள்ளுவர் ஒரு குறளில் குறிப்பிடுவார். தலைவர்கள் நெருப்பைப் போன்றவர்கள். மிகவும் நெருங்கினால் பொசுக்கிவிடுவார்கள். தொலைவில் நின்றால் பலன் கிடையாது. ஆகவே சரியான தூரத்தில் இருந்து அதன் பலனை அனுபவிக்க வேண்டுமென்று அதன் பொருள் இருக்கும். அது போலத்தான் பூமியும். சரியான தூரத்தில் இருப்பதால் நாம் உயிர் வாழ முடிகிறது!!



அத்தகைய பூமியில் எத்தனையோ கண்டங்கள் இருக்க, ஆசியா என்றொரு கண்ட்ம் இருப்பது நீங்கள் அறிந்ததே. அதில் நடு நாயகமாக இந்தியா என்றொரு தேசம் இருப்பதும் உங்களுக்குத் தெரிந்ததே. அதன் தென் கிழக்கு மூலையில் தமிழ் நாடு என்றொரு மா நிலம் இருக்கிறது என்று சொன்னால் என்னை நீங்கள் அடிக்க வருவீர்கள். அதிலும் அதன் தலை நகர் சிங்காரச்சென்னை என்று சொன்னால் உங்களுக்குப் பொத்துக் கொண்டு வந்துவிடும். பரவாயில்லை.


சரி விஷயத்திற்கு வருகிறேன். (பார்த்தீர்களா வளர்ச்சியை ! இதற்கு முன்பு இரண்டாவது பாராவிலேயே விஷயத்திற்கு வருபவன், இப்போது மூன்றாவது பாராவிற்கு வந்துள்ளேன். இப்படியே போனால்.....) என்ன இன்னும் விஷயத்திற்கு வரவில்லையா? சரி சரி. அதாவது 'ஸ்பெஷல்' என்ற ஒரு வார்த்தை ஆங்கிலத்தில் இருக்கலாம். ஆனால் அதன் பயன் பாடு இங்குதான் அதிகம்.


யாராவது நம்மை ஸ்பெஷலாகக் கவனிக்க மாட்டார்களா? என்ற ஒரு ஏக்கம். கடவுள் தரிசனம் செய்ய ஸ்பெஷல் க்யூ. சினிமாவில் ஸ்பெஷல் ஷோ. ஸ்பெஷல் ட்ரெயின். ஸ்பெஷல் பஸ், இன்னும் என்னென்ன உண்டோ அத்தனையும் ஸ்பெஷல் தான்.


பள்ளிக்கூடத்தில் கூட ஸ்பெஷல் கிளாஸ் இருக்கிறது என்றால் என்னவென்று சொல்வது.


தோசையை எடுத்துக் கொள்ளுங்களேன். சாதாவும் இருக்கிறது. ஸ்பெஷலும் இருக்கிறது. இரண்டிற்கும் ஒரு மி.மீ. சுற்றளவுதான் வித்தியாசம். ஆனால் நம் மக்கள் உணவகத்திற்குச் சென்றால் ஸ்பெஷல் தான் ஆர்டர் செய்வார்கள். என்ன செய்வது, இவர்களெல்லாம் பந்தா பரமசிவன்களாயிற்றே.


இன்னொரு விஷயம் மக்களுக்கு ஸ்பெஷல் என்று சொல்லக் கூட வாய் வலிக்கிறது. ஸ்பெஷல் எஸ்.பி ஆகிவிட்டது. ஒரு எஸ்.பி போடு என்று சொன்னால் பக்கத்தில் யாராவது எஸ்.பி இருந்தால் இவன் டெரரிஸ்ட் போல இருக்கிறதே என்று சொன்னவரையே போட்டுத் தள்ளிவிடும் அபாயம் கூட இருக்கிறது!!


சரவண பவனில் இன்னும் கொடுமை என்னவென்றால் ஸ்பெஷல் காப்பியாம். அதே காப்பி, ஸ்பெஷல் என்ற வார்த்தையைச் சேர்த்து, கூட இரண்டோ மூன்றோ ரூபாய்களை அள்ள வேண்டியது. இவர்களும் கொடுப்பதை விழுங்கிவிட்டு பணத்தைக் கொடுத்துவிட்டு வந்து சேர வேண்டியது. இதே மாதிரி ஸ்பெஷல் மீல்ஸ், ஸ்பெஷல் இட்லி, ஸ்பெஷல் பணியாரம், ஸ்பெஷல் தண்ணீர்!... அட தேவுடா...


டெலிபோனில் கூப்பிட்டு சார் நாங்க எக்ஸ்.ஒய்.இஜட் கம்பெனிலேருந்து பேசறோம். உங்கள ஸ்பெஷலா செலக்ட் பண்ணி ஒரு ஸ்பெஷல் ஆஃபர் குடுக்கறோம். நீங்க நேர்ல வந்து ஒரு அமவுண்ட கட்டிட்டு இந்த ஸ்பெஷல் ஆஃபர வாங்கிக்கலாம்னு சொல்லுவாங்க. ஆகா, இந்த ஸ்பெஷல் படும் பாடு இருக்கிறதே, சொல்லி மாளாது.


====


இவ்வளவு சொல்கிறாயே. நீ என்ன ஸ்பெஷலா? என்று நீங்கள் கேட்கலாம். இல்லாவிட்டாலும் நான் சொல்லித்தான் ஆகவேண்டும். இல்லையென்றால் இந்தப் பதிவு எதற்கு???


என்னைப் பொறுத்த வரை நான் ஒரு 'ஸ்பெஷல்' அல்லெர்ஜிக். அதாவது ஸ்பெஷல் எனக்கு ஆகவே ஆகாது. ஸ்பெஷல் ட்ரெயின் வந்தால் ஏறவே மாட்டேன். ஸ்பெஷல் பஸ்சிலோ காலே வைக்க மாட்டேன். ஸ்பெஷல் காப்பிதான் கிடைக்கிறது என்ற ஒரே காரணத்திற்காக நான் சரவண பவன் பக்கமே தலை வைப்பதில்லை.


எப்போதுமே சாதா தோசைதான் சாப்பிடுவேன். பள்ளிக்கூடத்தில் எப்போதுமே ஸ்பெஷல் கிளாசுக்குப் போனதே இல்லை (ரெகுலர் கிளாசுக்கு? என்று நீங்கள் கேட்பது அவுட் ஆஃப் சில்லபஸ். ஆகவே சாய்சில் விடப்படுகிறது)


கோவிலுக்குச் சென்றால் ஸ்பெஷல் கியூவில் எல்லாம் நிற்கவே மாட்டேன். நேராக நமக்குத் தெரிந்தவர் மூலம் உள்ளே சென்றுவிடுவேன்.


மொத்தத்தில் ஸ்பெஷல் என்ற வார்த்தையைக் கேட்டாலே எனக்கு ஆகாது.


இதுதான் என் ஸ்பெஷாலிட்டி. இது எப்படி இருக்கு.